ایران کو امریکا کا 7 روزہ اعتماد سازی منصوبے پر جواب موصول
ایران کے وزیر خارجہ عباس عراقچی کو امریکا کی جانب سے پیش کیے گئے 7 روزہ اعتماد سازی منصوبے پر واشنگٹن کا جواب موصول ہوگیا ہے۔
رائٹرز کے مطابق عراقچی نے دوحہ میں قطری ثالثوں سے ملاقات کی، جہاں انہیں امریکی مؤقف سے آگاہ کیا گیا۔ وہ جواب لے کر تہران پہنچیں گے اور ایرانی قیادت سے مشاورت کریں گے۔
ذرائع کے مطابق امریکا اور ایران کے درمیان بنیادی اختلاف منصوبے پر عملدرآمد کی ترتیب سے متعلق ہے۔ ایران نے تجویز دی تھی کہ شرائط پوری ہونے کی صورت میں آبنائے ہرمز کو 7 روز کے اندر معمول کی بحری آمدورفت کے لیے کھولا جائے، جس کے بعد وسیع تر مذاکرات شروع ہوں۔
قطر اس معاملے میں دونوں ممالک کے درمیان پیغامات کی ترسیل اور بالواسطہ رابطوں میں ثالث کا کردار ادا کر رہا ہے۔ مذاکرات میں آبنائے ہرمز، اقتصادی پابندیوں اور مستقبل کے جوہری مذاکرات سمیت مختلف امور زیرِ بحث ہیں۔
ابھی تک کسی حتمی معاہدے یا جنگ کے خاتمے کا اعلان نہیں کیا گیا۔
