بھگونت مان کا پاکستان آنے کا اظہارِ خواہش، کرتارپور راہداری کھولنے کا مطالبہ
بھارتی پنجاب کے وزیراعلیٰ بھگونت مان نے پاکستان میں منعقد ہونے والی ورلڈ پنجابی کانفرنس میں شرکت کی خواہش ظاہر کرتے ہوئے مودی حکومت کی پالیسیوں پر سوالات اٹھا دیے۔
بھارتی میڈیا کے مطابق بھگونت مان نے پنجاب اسمبلی میں کہا کہ جب مودی حکومت انہیں فرانس اور جاپان جانے کی اجازت نہیں دیتی تو پاکستان آنے کی اجازت کیسے دے گی؟
بھارتی پنجاب اسمبلی کے اسپیکر اور ارکان نے بھی پاکستان آنے کی خواہش ظاہر کی، جبکہ وزیراعلیٰ نے کرتارپور اور ننکانہ صاحب میں مذہبی رسومات کی ادائیگی کے لیے راہداری کھولنے کا مطالبہ کیا۔
پہلگام واقعے کے بعد مئی 2025 سے بھارتی سکھ یاتریوں کی پاکستان آمد پر پابندی برقرار ہے، جس سے مذہبی مقامات کی زیارت متاثر ہوئی ہے۔
دوسری جانب پاکستانی وزارتِ خارجہ نے واضح کیا ہے کہ راہداری بند ہونے کے باوجود پاکستان بھارتی سکھ یاتریوں کے استقبال کے لیے تیار ہے۔
