خیبرپختونخوا اور بلوچستان میں سکیورٹی فورسز کی کارروائیاں، 18 دہشت گرد ہلاک
سکیورٹی فورسز نے خیبرپختونخوا اور بلوچستان میں کارروائیاں کرتے ہوئے 18 دہشت گردوں کو ہلاک کرنے کا دعویٰ کیا ہے۔
سکیورٹی ذرائع کے مطابق شمالی وزیرستان میں انٹیلی جنس بیسڈ کارروائی کے دوران 13 خوارج ہلاک ہوئے۔ فورسز نے شمالی وزیرستان اور گردونواح میں دہشت گردوں کے ٹھکانوں کو نشانہ بنایا۔
ذرائع کا کہنا ہے کہ دہشت گردوں کی نقل و حرکت پر مسلسل نگرانی کے بعد یہ کارروائی کی گئی۔
دوسری جانب بلوچستان کے ضلع مستونگ کے علاقوں سیاپشت اور کلی گشتری میں فتنہ الہندوستان کے خلاف کارروائی کے دوران 5 دہشت گرد ہلاک ہوئے۔ کارروائی کے دوران ہلاک دہشت گردوں کے قبضے سے اسلحہ اور گولہ بارود بھی برآمد کرنے کا دعویٰ کیا گیا ہے۔
سکیورٹی فورسز کے مطابق علاقے میں ممکنہ دہشت گردوں کی موجودگی کے پیش نظر کلیئرنس اور سرچ آپریشن جاری ہے۔ حکام کا کہنا ہے کہ دہشت گردی کے مکمل خاتمے تک کارروائیاں جاری رہیں گی۔
