خیبرپختونخوا کے مسائل پر توجہ دینے کے بجائے سیاسی سرگرمیوں پر زور دیا جا رہا ہے: محمد علی شاہ باچا
پشاور: پیپلز پارٹی خیبرپختونخوا کے صدر محمد علی شاہ باچا نے پی ٹی آئی کو تنقید کا نشانہ بناتے ہوئے کہا ہے کہ صوبے میں دہشت گردی، امن و امان، کرپشن، ترقی اور گورننس جیسے مسائل پر توجہ دینے کے بجائے سیاسی سرگرمیوں اور عمران خان کے بیانیے پر زور دیا جا رہا ہے۔
پشاور میں نیوز کانفرنس کرتے ہوئے محمد علی شاہ باچا نے کہا کہ پی ٹی آئی کی قیادت مختلف اضلاع کے دورے کر رہی ہے، تاہم صوبے کے بنیادی مسائل کے حل پر بھی توجہ دینی چاہیے۔
انہوں نے دعویٰ کیا کہ جن اضلاع میں پی ٹی آئی کی قیادت پہنچ رہی ہے، وہاں دیگر سیاسی جماعتوں کو جلسے، احتجاج یا اجتماعات کرنے میں مشکلات کا سامنا ہے۔ ان کے مطابق اس صورتحال کا نقصان بالآخر عوام کو ہو رہا ہے۔
پیپلز پارٹی کے صوبائی صدر نے کہا کہ خیبرپختونخوا میں دہشت گردی، امن و امان، کرپشن اور گورننس کے مسائل موجود ہیں، جبکہ نوجوانوں کو سیاسی اختلافات اور نفرت کی طرف لے جانے کے بجائے روزگار اور ترقی کے مواقع فراہم کرنے کی ضرورت ہے۔
انہوں نے کہا کہ عوام نے پی ٹی آئی کے نمائندوں پر اعتماد کرتے ہوئے انہیں منتخب کیا، اس لیے صوبائی حکومت کو دہشت گردی کے خاتمے، ترقی، روزگار اور بہتر گورننس پر توجہ دینی چاہیے۔
محمد علی شاہ باچا نے کہا کہ پی ٹی آئی کی جانب سے حکومت پر صوبے میں سیاسی مداخلت یا تبدیلی کی کوششوں کے تاثر کے حوالے سے بھی سوالات اٹھائے جا رہے ہیں۔ ان کا کہنا تھا کہ اگر پی ٹی آئی کو خدشہ ہے کہ حکومت ایمرجنسی یا گورنر راج نافذ کرنا چاہتی ہے تو اسے چاہیے کہ وہ صوبے کے مسائل حل کرنے اور عوام کی خدمت پر توجہ دے۔
