پاکستان اور بحرین میں تجارت و سرمایہ کاری بڑھانے پر اتفاق
نائب وزیراعظم اور وزیر خارجہ سینیٹر محمد اسحاق ڈار سے بحرین کے وزیر خارجہ ڈاکٹر عبداللطیف بن راشد الزیانی نے وزارت خارجہ میں ملاقات کی۔
ملاقات میں پاکستان اور بحرین کے دوطرفہ تعلقات کے مختلف پہلوؤں کا جائزہ لیا گیا، جبکہ تجارت، معاشی شراکت داری اور سرمایہ کاری کے شعبوں میں تعاون مزید بڑھانے پر اتفاق کیا گیا۔
دونوں وزرائے خارجہ نے کثیرالجہتی بین الاقوامی فورمز پر مشترکہ دلچسپی کے معاملات میں روابط مزید مؤثر بنانے پر بھی گفتگو کی۔
اسحاق ڈار اور عبداللطیف بن راشد الزیانی نے اعلیٰ سطح کے سفارتی رابطوں میں ہونے والی مثبت پیش رفت پر اطمینان کا اظہار کیا اور دوطرفہ تعلقات کو مزید مضبوط بنانے کے عزم کا اعادہ کیا۔
ملاقات میں خطے کی بدلتی ہوئی صورتحال اور عالمی سطح پر ہونے والی پیش رفت پر بھی تبادلہ خیال کیا گیا۔ دونوں رہنماؤں نے اس بات پر اتفاق کیا کہ اختلافات اور تنازعات کے حل کے لیے مذاکرات اور سفارت کاری ہی مؤثر راستہ ہیں۔
