ایم ٹی آنر 25 کے مزید 3 پاکستانی کریو ارکان وطن واپس پہنچیں گے: اسحاق ڈار
نائب وزیراعظم اور وزیر خارجہ اسحاق ڈار نے اعلان کیا ہے کہ ایم ٹی آنر 25 کے مزید تین پاکستانی کریو ارکان آج وطن واپس پہنچیں گے۔
اسحاق ڈار کے مطابق عمران علی، حسین یوسف اور محمد یاسین ادیس ابابا سے کراچی پہنچیں گے، جہاں وہ اپنے اہلخانہ سے دوبارہ ملاقات کریں گے۔
نائب وزیراعظم نے بتایا کہ پاکستانی سفیر نے تینوں کریو ارکان سے ملاقات کی اور انہیں ضروری سہولیات فراہم کیں۔ حکومت نے تمام پاکستانی کریو ارکان کی محفوظ وطن واپسی کے لیے بھرپور کوششیں کیں۔
اسحاق ڈار نے کہا کہ وزیراعظم شہباز شریف کی قیادت میں کریو ارکان کی بحفاظت واپسی کے لیے تمام ممکنہ اقدامات کیے گئے۔ انہوں نے واپسی میں معاونت کرنے والے افراد اور اداروں کا بھی شکریہ ادا کیا۔
نائب وزیراعظم نے ایم ٹی آنر 25 کے تین پاکستانی کریو ارکان کے جاں بحق ہونے پر گہرے دکھ اور افسوس کا اظہار کیا اور مرحومین کے اہلخانہ سے تعزیت کی۔
انہوں نے کہا کہ پاکستان سمندری راستوں اور بحری کارکنوں کی سلامتی یقینی بنانے کے لیے عالمی تعاون جاری رکھے گا اور بحری قزاقی کے خلاف عالمی شراکت داروں کے ساتھ تعاون کے عزم پر قائم ہے۔
