پاکستان اور پولینڈ کا سکیورٹی و انسداد دہشت گردی تعاون بڑھانے پر اتفاق
وفاقی وزیر داخلہ محسن نقوی اور وزیر مملکت برائے داخلہ طلال چوہدری سے پولینڈ کے وزیر اور کونسل آف منسٹر کے سربراہ ٹوماش شیمونیاک نے ملاقات کی، جس میں پاکستان اور پولینڈ کے درمیان دوطرفہ تعلقات اور سکیورٹی تعاون کے فروغ پر تبادلہ خیال کیا گیا۔
ملاقات میں سکیورٹی، انٹیلیجنس شیئرنگ، انسداد دہشت گردی، غیر قانونی مائیگریشن اور قانون نافذ کرنے والے اداروں کے درمیان تعاون بڑھانے پر اتفاق کیا گیا۔
فریقین نے میوچل لیگل اسسٹنس سمیت مختلف مفاہمتی یادداشتوں کو جلد حتمی شکل دینے پر اتفاق کیا۔ دونوں ممالک کے درمیان روابط مزید مضبوط بنانے کے لیے وزیر مملکت طلال چوہدری کی سربراہی میں وزارت داخلہ کا وفد جلد پولینڈ کا دورہ کرے گا۔
محسن نقوی نے کہا کہ حکومت نے منشیات، غیر قانونی مائیگریشن اور منظم جرائم کے خلاف زیرو ٹالرنس پالیسی اپنائی ہے۔ ان کے مطابق حکومتی اقدامات کے نتیجے میں پاکستان سے یورپ کی جانب غیر قانونی امیگریشن میں 64 فیصد کمی آئی ہے۔
پولینڈ کے وزیر ٹوماش شیمونیاک نے تعاون کی یقین دہانی کراتے ہوئے کہا کہ پاکستانی شہریوں کو قانونی طریقے سے پولینڈ آنے پر خوش آمدید کہا جائے گا۔ دونوں جانب یورپ میں پاکستانیوں کے لیے قانونی روزگار اور مائیگریشن کے مواقع بڑھانے پر بھی اتفاق کیا گیا۔
ملاقات میں دونوں ممالک کے درمیان عوامی، تجارتی اور کاروباری روابط بڑھانے، جی ایس پی پلس سے متعلق تعاون اور آفیشل پاسپورٹ پر ویزا فری سہولت کے معاملے پر بھی گفتگو ہوئی۔
پولش وزیر نے خطے میں امن و استحکام کے لیے پاکستان کی کوششوں کی حمایت کا اظہار کیا۔
