پاکستان اور آئی ایم ایف کے درمیان اقتصادی جائزے پر مذاکرات شروع
پاکستان اور عالمی مالیاتی فنڈ (آئی ایم ایف) کے درمیان اقتصادی جائزے کے حوالے سے مذاکرات کا آغاز ہوگیا ہے۔ وزیر خزانہ محمد اورنگزیب نے آئی ایم ایف مشن کے ساتھ ورچوئل کِک آف اجلاس میں شرکت کی۔
ذرائع کے مطابق اجلاس میں آئی ایم ایف مشن کی سربراہی آئیوا پیٹرووا نے کی، جبکہ پاکستان اور آئی ایم ایف کے درمیان ای ایف ایف کے چوتھے جائزے پر بات چیت ہوئی۔
مذاکرات کے دوران آر ایس ایف کے تیسرے جائزے، ملکی معاشی صورتحال، مالیاتی امور اور اصلاحاتی اقدامات پر بھی تفصیلی گفتگو کی گئی۔
وزیر خزانہ نے آئی ایم ایف حکام کو معاشی استحکام اور اصلاحات کے حوالے سے حکومت کی پیش رفت سے آگاہ کیا۔ اجلاس میں پروگرام کے مقررہ اہداف اور اب تک حاصل ہونے والی پیش رفت کا جائزہ بھی لیا گیا۔
ذرائع کے مطابق مذاکرات میں محصولات میں بہتری، مالیاتی نظم و ضبط، معاشی استحکام اور آئندہ کے لائحہ عمل سمیت مختلف امور زیر بحث آئے۔ آئی ایم ایف مشن پاکستانی حکام کے ساتھ معاشی و مالیاتی اقدامات پر بات چیت جاری رکھے گا۔
