- وفاقی وزیر اطلاعات و نشریات عطا اللہ تارڑ نے کہا ہے کہ دہشت گردی کے خلاف ایک ملک میں 2 خارجہ پالیسیاں نہیں ہو سکتیں، خیبرپختونخوا میں صوبائی حکومت کی عملداری ختم ہو چکی تھی، امید ہے اب خیبرپختونخوا کے حالات میں بہتری آئے گی۔
وفاقی وزیر قانون اعظم نذیر تارڑ کے ہمراہ غیر ملکی میڈیا کے نمائندوں کو بریف کرتے ہوئے وزیر اطلاعات عطاء اللہ تارڑ کا کہنا تھا کہ وفاقی حکومت نے پاکستان تحریک انصاف اور خیبر پختونخوا حکومت کے ساتھ دہشتگردی کے خلاف مشترکہ پالیسی پر اتفاق رائے کیلئے متعدد بار مذاکرات کی کوشش کی، تاہم وزیراعلیٰ خیبر پختونخوا انسداد دہشتگردی کے مربوط اقدامات پر آمادہ نہیں ہوئے، آئین کے تحت اقدامات کیے، اب صوبائی میں کوئی دہشت گردوں کا حامی نہیں۔
ان کا کہنا تھا کہ ہم پی ٹی آئی کے ساتھ دہشت گردی کے خلاف اقدامات اور مشترکہ پالیسی کے بارے میں مذاکرات کر رہے تھے، وفاقی حکومت کا کوئی سیاسی ایجنڈا نہیں، خیبرپختونخوا کے عوام نے گورنر راج اور ایمرجنسی کے اقدام کا خیرمقدم کیا، امیدہے اب خیبرپختونخوا کے حالات میں بہتری آئے گی۔
انہوں نے کہا کہ ایک ملک کی دو خارجہ پالیسیاں نہیں ہو سکتیں، ایک طرف ہم افغانستان کے حوالے سے بات چیت اور سفارتی کوششیں کر رہے ہیں، ہمارا مطالبہ ہے کہ افغانستان میں دہشت گردوں کی محفوظ پناہ گاہیں ختم کی جائیں اور عبوری افغان حکومت قابل اعتبار اقدامات کرے تاکہ افغان سرزمین پاکستان کے اندر دہشت گردانہ حملوں کیلئے استعمال نہ ہو۔
ان کا کہنا تھا کہ دوسری طرف صوبائی حکومت کی عبوری افغان حکومت کے بارے میں الگ پالیسی ہے، دہشت گردی کے خلاف ایک ہی ملک میں دو مختلف پالیسیاں کیسے ہو سکتی ہیں؟ آئین سازوں نے ان دفعات کو آئین میں ایسے ہی حالات سے نمٹنے کیلئے شامل کیا تھا۔
عطاء تارڑ نے کہا کہ صوبے میں حکمرانی کا نظام مکمل طور پر مفلوج ہو چکا تھا، امن و امان کی صورتحال بھی مکمل طور پر خراب ہوگئی تھی، دہشت گردوں کی سرگرمیوں میں نمایاں اضافہ ہوا ہے۔
وفاقی وزیر کا کہنا تھا کہ قومی مالیاتی کمیشن (این ایف سی) کے ذریعے اب تک خیبر پختونخوا حکومت کو تقریباً 800 ارب روپے فراہم کئے جا چکے ہیں، سوال یہ ہے کہ یہ بہت بڑی رقم ہے، اسے دہشت گردی کے خلاف کاؤنٹر ٹیررازم ڈیپارٹمنٹ (سی ٹی ڈی) قائم کرنے پر کیوں خرچ نہیں کیا گیا؟ یہ رقم خیبر پختونخوا میں سیف سٹی کیمرے نصب کرنے کے لئے کیوں استعمال نہیں ہوئی؟
انہوں نے کہا کہ پرتشدد انتہاء پسندی کے خلاف موثر بیانیہ تشکیل دینے پر یہ رقم کیوں خرچ نہیں کی گئی؟ فرانزک لیبارٹری قائم کرنے یا پولیس کے لئے جدید آلات خریدنے کی غرض سے یہ وسائل کیوں استعمال نہیں کئے گئے؟
ان کا کہنا تھا کہ چند ہفتے قبل خیبر پختونخوا میں کوہاٹ کا دورہ کیا جہاں دہشت گردی کا واقعہ پیش آیا تھا، میں نے ہسپتال میں زخمیوں سے ملاقات کی، شہداء کے گھروں پر بھی گیا، خیبر پختونخوا میں لوگ ہر ممکن طریقے سے دہشت گردی کا خاتمہ چاہتے ہیں، شدید مشکلات اور تکالیف برداشت کرنے کے باوجود زخمی افراد کے عزم اور حوصلے میں کوئی کمی نہیں تھی۔
عطاء اللہ تارڑ نے کہا کہ جو حکومت عوام کے جان و مال کی حفاظت اور صوبے میں امن و امان برقرار رکھنے کی ذمہ دار ہو، وہ دہشت گردوں کے ساتھ مل کر ان کی سرگرمیوں کو فروغ کیسے دے سکتی ہے؟ صوبے میں سیاست، دہشت گردی اور جرائم کے درمیان ایک مبینہ گٹھ جوڑ موجود تھا۔
