وزیراعلیٰ خیبرپختونخوا سہیل آفریدی نے اعلان کیا ہے کہ پاکستان تحریک انصاف (پی ٹی آئی) کا لانگ مارچ 4 اکتوبر کو روانہ ہوگا جبکہ 5 اکتوبر کو یوم فتح منایا جائے گا۔
خیبر پختونخوا کے صوبائی دارالحکومت میں میڈیا سے گفتگو کرتے ہوئے سہیل آفریدی کا کہنا تھا کہ سیاسی کمیٹی کے اجلاس میں لانگ مارچ سے متعلق تمام تفصیلات پر غور کیا گیا ہے، پی ٹی آئی کا احتجاج پرامن ہو گا جب کہ آئین پرامن احتجاج کی اجازت دیتا ہے۔
انہوں نے کہا کہ لانگ مارچ حقیقی آزادی کے لیے کیا جا رہا ہے، احتجاج کو مؤخر کرنا سیاسی حکمت عملی تھی، تاہم اب 4 اکتوبر کو کارکن روانہ ہوں گے۔
وزیراعلیٰ خیبر پختونخوا کا کہنا کہ کارکنوں میں اس مرتبہ جو غصہ پایا جا رہا ہے، ایسا غصہ تاریخ میں نہیں دیکھا، تاہم لانگ مارچ کے بعد بھی مذاکرات اور ڈائیلاگ کا سلسلہ جاری رہے گا۔
سہیل آفریدی نے وفاقی حکومت پر تنقید کرتے ہوئے کہا کہ کارکنوں کی گرفتاریوں اور پولیس کے ساتھ رویے کے بجائے معاملات کو سیاسی طور پر حل کیا جائے، پی ٹی آئی پاکستان کے ساتھ کھڑی ہے اور ملک کو تقسیم نہیں ہونے دے گی۔
اُنہوں نے مطالبہ کیا کہ اسلام آباد کھولا جائے اور عدالتی احکامات پر عملدرآمد کیا جائے، بصورت دیگر پی ٹی آئی کارکن اپنا احتجاج کریں گے۔
